साे फैलु छ्याेए

तमु जातिले कुल पूजा गर्नुलाई ‘फैलु त्हेँ’, फैलुपूजा’, ‘फैलु लब’ भनेर भन्दछ । कुललाई तमु जातिको शास्त्रमा ‘क्ल्ह्याये न्हेसा प्ह्रेए न्हेसा’ भन्दछ । जाति अनुसारको कुलको नाम फरक फरक हुने भएकाले कुलको पूजा गर्ने तरिका पनि फरक फरक हुन्छ । कुल देवता अथवा कुलायन भन्नाले कुल अथवा वंशमा पूजा गरिने देवता हो । प्रत्येक वंशको आफ्नै कुलायन अर्थात् कुल देवता हुन्छ । तमु (गुरुङ)हरुले ‘फैलु पूजा’ राखेमा जीवित हुँदा गरिनेलाई ‘सो फैलु’ र मृत्यु हुँदा ‘सी फैलु’ गर्ने गरिन्छ । तमु (गुरुङ)जातिले खास गरी ‘फैलु पूजा’ तीन प्रकारले गरिन्छ । ‘फैलु त्हेँ’ सबै खेगीहरूले गरिरहेको भए तापनि हाल आएर अधिकांश खेगीलाई पनि तीन प्रकारका ‘फैलु’ बारे थाहा नहुन सक्छ । यही बारेमा जानकारी दिने उद्देश्यले ‘सो फैलु’ को पुस्तक प्रकाशन भइसकेको छ । विस्तृत जानकारीका लागि पुस्तक पढ्नुहोस् ।